政Whats噏:無懼冷門 袁振寧搞深度遊旅團

袁振寧認為旅行團仍然有得做。

港人外遊愈來愈喜歡選擇自由行,參加旅行團漸漸變成冷門選擇。縱橫遊常務董事袁振寧(CN)就認為,只要花啲心思,旅行團仍然有得做。

袁振寧話近年廉航同網上購票網站興起,大大方便自由行旅客,以日本呢個港人最喜歡的旅行目的地為例,目前只得10%人報團前往。加上網絡冒起不惜工本來搶佔市場的網上旅行團,都令好多老字號旅行社難以招架。不過,在嚴峻挑戰當中,袁振寧亦見到機會,在廉航同網絡所形成的旅遊文化中,除了一批浮光掠影嘅觀光客,亦有唔少人希望對目的地有較深切了解。袁振寧覺得可以為呢批客人安排非一般參觀項目,感受與別不同旅遊體驗。

袁振寧正策劃一個旅行團,特別之處是會到訪日本某些寺院,而呢啲寺院平日都係遊客禁地,需事先申領許可才得以進入。至於如何得到寺院許可,袁振寧就話有賴旅行社同當地長期建立的人脈關係,而呢一點,一般自由行便難以辦到。

深度旅行團講求節目,領隊當然亦要由具代表性的旅遊達人來擔當。袁振寧話台灣是日本以外另一個港人鍾情的旅遊地,但係他未搵到適合的旅遊達人來當領隊,組織台灣深度遊旅行團惟有暫時擱置。

原文: 東網
01-08-2017